Kompania “ERZENI”, është e angazhuar të ofrojë një nivel të lartë cilësor të produkteve dhe shërbimeve, të sigurisë ushqimore, për PRODHIMIN, MAGAZINIMIN dhe SHPËRNDARJEN e produkteve me bazë qumështi. Këto produkte, janë konform legjislacionit shqiptar në fushën e ushqimit dhe kanë cilësinë dhe sigurinë ushqimore që kërkojnë konsumatorët tanë.
Sistemet tona të prodhimit dhe larjes së linjave janë dizenjuar që të kenë kontroll dhe monitorim të automatizuar plotësisht të çdo procesi në çdo lloj faze.
Sapo mbërrin në fabrikë, përpara futjes në prodhim, qumështi kontrollohet për prezencën e antibiotikëve, aflatoksinës, qelizave somatike, prezencës së falsifikimeve të ndryshme, treguesve të aciditetit dhe aromave të qumështit, për përcaktimin e cilësisë dhe destinimit të tij.
Pas kontrollit fillestar, qumështi kalon në repartin e pranimit, ku filtrohet, peshohet, ftohet deri në 2⁰C dhe kalohet në depozitat e pranimit sipas destinimit të tij.
Fabrika e qumështit "ERZENI", është e pajisur me teknologji moderne, për përpunimin e qumështit dhe prodhimin e produkteve prej tij.
Përpunimi i qumështit kryhet në bllokun e pasterizimit.
Qumështi dërgohet në homogjenizator dhe nën presionin e lartë, copëzon globulat e yndyrës në dimensione të tilla, sa të humbin kapacitetin e bashkimit. Pas një operacioni të tillë pjesa e yndyrshme (kremi) e homogjenizuar, bashkohet me pjesën e hollë për fazën e pasterizimit. Si pasojë e këtij procesi, parandalohet ndarja e kremës gjatë inkubimit, sigurohet një shpërndarje e njëtrajtshme e yndyrës në produkt, prandaj qumështi i pasterizuar, kosi dhe dhalla, kanë të njëjtën sasi yndyre si në pjesën e sipërme dhe në fund të paketimit. gjithashtu përmirësohet qëndrueshmëria dhe konsistenca e produkteve të fermentuara dhe yndyra bëhet lehtësisht më e tretshme nga organizmi.